ڕێژنە میدیا
لە هەر پێنج کەسێکى پێگەیشتو، کەسێک توشى پرخە دەبێت لەکاتى خەودا، کە زۆرجار کەسەکان دەترسن لەو کاتەدا هەناسەیان بوەستێت یاخود کێشەى بۆ دروست ببێت و ئەمەش دەبێتە هۆى دروستبونى کێشە بۆ ژیانى رۆژانەیان.
پرخە لەکاتى خەوتندا کێشەیەکە نابێت بە سادەیی وەربگیرێت و هەوڵى چارەسەرى نەدرێت، چونکە بەپێى وتەى پزیشکان پرخە بۆ ماوەیەکى درێژ دەکرێت ئەگەرى توشبون بە نەخۆشییەکانى دڵ بە رێژەى 30% و جەڵتەى مێشک بە رێژەى 60% زیاد بکات.
دەیڤد چارلى، پزیشکێکى پسپۆڕى بەریتانییە و لەوبارەیەوە دەڵێت: ئەو کەسانەى بۆ ماوەیەکى درێژ توشى پرخە دەبن لەکاتى خەودا ئەگەرى توشبونیان بە نەخۆشییەکانى دڵ و مێشک هەیە و لە روى دەرونییشەوە ئەگەرى هەیە توشى خەمۆکى ببنەوە.
دەشڵێت: ئەو کەسانەى ئەو حاڵەتەیان هەیە ئەگەر هەیە لە تەمەنێکى کەمدا توشى شەکرەى جۆرى دوو ببنەوە، باس لەو کێشانەش دەکات کە پرخە زیاد دەکەن و دەڵێت: قەڵەوى و خواردنەوەى ماددە کهولییەکان و جگەرەکێشان و خەوتن لەسەر پشت پرخە لەکاتى خەودا زیاد دەکەن.
